Margt í hinni fornu bænahefð
hér á landi og í Evrópu
miðaðist að því
að lægja öldur hugans
og koma á tengingu við
dýpri svið vitundarinnar.

Hin sálfræðilega hlið
andlegra iðkana eins og
 hugleiðslu og bænar,
hefur nú aftur verið
tekin til skoðunar.
Hvað nákvæmlega
gerist, er þó enn í dag
 viss leyndardómur.

Víða um lönd er nú talið
að bæn, hugleiðing
eða önnur andleg
eða trúarleg iðkun
hafi jákvæð áhrif
á meðhöndlun sjúkra.
Vísindalegar rannsóknir
t.a.m. við Læknadeild
Harvardháskóla,
hafa staðfest þetta.

Nú er stödd hér á landi
Elizabeth Blackburn,
nóbelsverðlaunahafi
í læknisfræði.
En hún hefur sýnt fram á
skaðlegar afleiðingar
streitu á litningaenda og
hugsanlegan orsakaþátt
í ýmsum sjúkdómum,
s.s. krabbameinum í brjósti.

Hér er átt við bruna
í taugaendum;
afleiðingin er slit
og minnkuð færni tauga
til að starfa eðlilega.
Heilbrigður lífsstíll,
omega 3 fitusýrur
- lýsið okkar góða -
og holl heyfing er
lykilatriði í heilsueflingu
á þessu sviði,
að mati Blackburn.

Þessu til viðbótar
mætti nefna mikilvægi
slökunar og djúpsvefns og
þeirrar sálrænu úrvinnslu
sem draumar geta
verið farvegur fyrir
og er nauðsynleg fyrir
endurnýjun sálarkrafta.

Vitað er að ýmis
heilandi hormón,
leysast betur úr læðingi
í slöku ástandi
og djúpsvefni.
Þetta gerist eftir því
sem hægir á heilabylgjum.
Er þar helst að nefna
vaxtarhormónið sem bæði
hefur áhrif á vöxt og þroska
barna og ungmenna
en hefur líka áhrif á
öldrunarferli líkamans
á síðari æviskeiðum.

Í könnun Skuggsjár 2003,
var m.a. spurt um
andlega iðkun og trú;
var fólk spurt hvort það
tryði mikið, lítið eða ekkert
á mátt bænarinnar.
Í ljós kom að um 66%
svöruðu afgerandi jákvætt
og um 10% hvorki né.

Djúp slökun getur fengist
í gegnum bæði
hugleiðslu og bæn
- hér er ekki verið
að prédika
ákveðin trúarbrögð -
sem síðan hefur áhrif
á heilabylgjur og
starfsemi miðtaugakerfis
og þar með
vitundarástand í vöku.
Ennfremur á gæði
svefns og drauma.
Allt eflir þetta lífsgæðin
og hæfnina til að takast
á við lífsbaráttuna.
 
Sofið vel og
dreymi ykkur vel!

Varðandi stórtíðindi
gærdagsins:
megi eldgosið
í Grímsvötnum,
fara mildilegum
höndum um
ábúendur á svæðinu,
land og þjóð og
hinn stærri umheim.

Talandi um mátt
bænarinnar, þá er
óbilandi bænakraftur
eldklerksins berdreymna,
séra Jón Steingrímsson,
einstakur vitnisburður um
mannlega þrautseigju
í hildarleik Skaftárelda
á ofanverðri 18.öld
sem upphaflega
voru tilkomnir
vegna kvikuinnskots frá
Grímsvatnaeldstöðinni.

En Skaftáreldar 
höfðu afgerandi áhrif,
 ekki bara hér heima
heldur í Evrópu og víðar;
líkast til hafði Eldhraun
- þetta þriðja stærsta hraun
sem runnið hefur
frá lokum Ísaldar -
og eitruð móðan frá gosinu
í Eldborgunum, (Laka),
afgerandi söguleg örlög
í för með sér fyrir þjóðir
Evrópu og Ameríku.
Nú varð að hugsa
margt uppá nýtt
og heimssagan
ekki söm á eftir.

.
'